អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានថ្លែងនៅក្នុងសន្និសីទសារព័ត៌មានថា ករណីយោធាថៃចូលរាយបន្លាលួសនេះ បានកើតឡើងនៅម៉ោង ១១ព្រឹកថ្ងៃទី០៤ ខែសីហា និងបើទោះបីជា កងកម្លាំងកម្ពុជាចេញទៅរារាំងហាមឃាត់យ៉ាងណាក៏ដោយ។ អ្នកស្រីបន្តថា ទីតាំងដែលកម្លាំងថៃចូលមកហ៊ុមព័ទ្ធទាំងនោះ ជាតំបន់ដែលក្រុមអនុព័ន្ធយោធាស្ថានទូតបរទេសនៅកម្ពុជា បានចុះទៅពិនិត្យកាលពីថ្ងៃទី៣០ ខែកក្កដា។
កម្ពុជាសូមអំពាវនាវដល់សហគមន៍អន្តរជាតិ ជាពិសេសប្រទេសដៃគូ ដែលបានខិតខំប្រឹងប្រែងជួយឱ្យសម្រេចបានបទឈប់បាញ់ដ៏លំបាកមួយនេះ ហើយសុទ្ធតែមានបំណងចង់ឃើញបទឈប់បាញ់មួយនេះ ដោយពេញលេញនិងប្រកបដោយប្រសិទ្ធភាព ទាមទារឱ្យភាគីថៃបញ្ឈប់ទង្វើឈ្លានពានរបស់ខ្លួនជាបន្ទាន់ និងគោរពឱ្យបានម៉ឺងម៉ាត់នូវច្បាប់អន្តរជាតិ ជាពិសេសអធិបតេយ្យ និងបូរណភាពទឹកដីកម្ពុជា។
— អ្នកស្រី ម៉ាលី សុជាតា
បណ្ដាញសារព័ត៌មានក្នុងស្រុកបានចុះផ្សាយដែរថា ភាគីថៃ បានចល័តទ័ព និងបញ្ជូនគ្រឿងចក្រចូលក្នុងតំបន់អានសេះ ដើម្បីឈូសឆាយធ្វើផ្លូវ និងកាយធ្វើលេណដ្ឋានថ្មី។ ភាគីកម្ពុជាចោទប្រកាន់ថា សកម្មភាពនេះ ផ្ទុយពីខ្លឹមសារនៃកិច្ចប្រជុំរវាងមេបញ្ជការភូមិភាគនៃប្រទេសទាំងពីរកាលពីថ្ងៃទី២៩ ខែកក្កដា ដែលបានសម្រេចគ្នាអនុវត្តបទឈប់បាញ់ឱ្យបានពេញលេញ ដោយមិនត្រូវបង្កើនកងទ័ព និងភាពតានតឹង អាចធ្វើឱ្យមានការប្រឈមមុខដាក់គ្នានៅតាមព្រំដែនឡើយ។
ការធ្វើសកម្មភាពបង្កហេតុរបស់កងទ័ពថៃជាថ្មីនេះ បានកើតឡើង ស្របពេលក្រុមលេខាធិការគណៈកម្មាធិការព្រំដែនទូទៅកម្ពុជានិងថៃ (GBC) កំពុងជួបប្រជុំនៅក្នុងប្រទេសម៉ាឡេស៊ី ពីថ្ងៃទី៤ ដល់ថ្ងៃទី៦ ខែសីហា និងមុនកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ ដែលត្រូវធ្វើឡើងនៅថ្ងៃទី០៧ ខែសីហា ហើយនឹងមានអ្នកតំណាងម៉ាឡេស៊ី ចិន និងអាមេរិក ធ្វើជាសង្កេតការណ៍។
កាលពីថ្ងៃទី២៩ ខែកក្កដា កងទ័ពថៃក៏បានបំពានលើបទឈប់បាញ់គ្នាដែរ ដោយបានប្រើរថក្រោះនិងកម្លាំងថ្មើរជើងបាញ់ប្រហារមកលើលេណដ្ឋានកងទ័ពខ្មែរ នៅតំបន់ជាំតែ ភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ និងបានប្រើប្រាស់កលល្បិចបក់ដៃហៅនិយាយស្វាគមន៍គ្នា ដើម្បីភ្ជង់ព័ទ្ធចាប់កងទ័ពជួរមុខកម្ពុជា ២០នាក់ ក្នុងនោះមានម្នាក់រត់រួច។
ក្នុងចំណោមកងទ័ពខ្មែរ១៩នាក់នោះ ថៃបានប្រគល់ឱ្យកម្ពុជាវិញបាន៣រូប ក្នុងនោះស្លាប់ម្នាក់ និងពីរនាក់ទៀត បានរងរបួសធ្ងន់ និងមានបញ្ហាស្មារតី ដែលកម្ពុជាសង្ស័យថា ដោយសារការធ្វើទារុណកម្មធ្ងន់ធ្ងរដើម្បីសួរចម្លើយ។
លោកនាយករដ្ឋមន្ត្រី ហ៊ុន ម៉ាណែត បានសរសេរបង្ហោះលើហ្វេសប៊ុកនៅថ្ងៃទី០៤ ខែសីហាថា ចំពោះកងទ័ពកម្ពុជានៅសល់១៦នាក់ ដែលថៃមិនព្រមដោះលែងនោះ គឺក្រសួងការពារជាតិកម្ពុជាបានធ្វើការងារជាប់ប្រចាំជាមួយភាគីថៃដើម្បីឱ្យដោះលែងវិញ ហើយរដ្ឋាភិបាលក៏បានស្នើទៅគណៈកម្មាធិការអន្តរជាតិកាកបាទក្រហម (ICRC) ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) និងគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស(AICHR) ដើម្បីឱ្យជួយអន្តរាគមន៍បន្ថែមលើរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។